Անմահ հերոս Էդգար Նարայան

Հայրենիքի պաշտպանության ժամանակ զոհված Էդգար Նարայանը ծնվել է 1995 թվականի հոկտեմբերի 4-ին Երևան քաղաքում։

«Էդգարն այս աշխարհից չէր, չափից շատ բարի էր, առանձնահատուկ։ Շատ ընկերասեր էր, միշտ նրանց կողքին էր, ցանկացած հարցում, բոլորի մասին մտածում էր, բացի իրենից»,- պատմում է քույրը՝ Մարիաննան։

Սովորել և ավարտել էր Երևանի  N44 դպրոցում, ավարտելուց հետո  ընդունվել էր Հայաստանի Եվրոպական քոլեջի հաշվողական տեխնիկայի և ավտոմատացված ծրագրային ապահովում ֆակուլտետը, ստացել տեխնիկի որակավորում:  Էդգարի անավարտ ցանկություններից էր, ծառայության ավարտից հետո ընդունվել Հայաստանի Ազգային Պոլիտեխնիկական համալսարան:

2015 թվականին անցել էր պարտադիր զինվորական ծառայության Տավուշի մարզի Մեհրաբի զորամասերից մեկում։ Շատ էր սիրել իր ծառայությունն ու սպաներին, շատ նվիրված էր։

Ծառայության ընթացքում Էդգարին Չինարի գյուղում գրեթե բոլորը  ճանաչում էին «Բարի զինվոր»  անունով, շատ անգամներ էր օգնել գյուղացիներին տարբեր գործերով։

2016 թվականի դեկտեմբերի 29-ին ՀՀ Տավուշի մարզի Չինարի գյուղից դեպի հարավ-արևելք ընկած պետական սահմանի հատվածում, ադրբեջանական զորքերը ձեռնարկել են դիվերսիոն-հետախուզական ներթափանցման փորձ, որը կանխվել է հայկական ուժերի կողմից: Ծավալված գործողությունների ժամանակ հայկական կողմն ունեցավ 3 մարտական կորուստ ավագ լեյտենանտ Շավարշ Մելիքյանը, շարքայիններ Էդգար Նարայանը և Էրիկ Աբովյանը:

Էդգար Գրիգորի Նարայանը հետմահու պարգևատրվել է Հայաստանի Հանրապետության «Մարտական ծառայություն» մեդալով։

Էգդարին հարազատները տեսել էին դեպքից երեք ամիս առաջ, երբ արձակուրդ էր եկել՝ քրոջ հարսանիքին մասնակցելու համար։ Հարազատները հիշում են, որ Էդգարի ցանկություններից մեկն էր քեռի դառնալը։

Չինարի գյուղի սահմանային այդ հատվածում, որտեղ զոհվել են հրամանատարն ու երկու զինվորները խաչքար է տեղադրվել ի հիշատակ նրանց սխրանքի։

«Հանուն հայ զինվորի» ՀԿ-ն և Banak.info-ի խմբագրությունը ցավակցում են ընտանիքի անդամներին և կիսում կորստյան ծանր վիշտը։

Ալվինա Հարությունյան