Անմահ հերոս Արթուր Գևորգյան

Ապրիլյան պատերազմում զոհված ժամկետային զինծառայող Արթուր Գառնիկի Գևորգյանը ծնվել է 1997 թվականի հունիսի 24-ին՝ Կոտայքի մարզի Աբովյան քաղաքում։ Արթուրը կրում էր քեռու անունը, որը զոհվել էր Արցախյան առաջին պատերազմում։

Դպրոցն ավարտելուց հետո Արթուրը հայրիկի հետ մեկնել է ՌԴ, հետո վերադարձել` ծառայության անցնելու նպատակով։ Ծառայել է Արցախի Հանրապետության (այժմ օկուպացված է Ադրբեջանի կողմից) Մեխակավանի զորամասերից մեկում` որպես ավագ-գնդացրորդ։

Արթուրը շատ տաղանդավոր պատանի էր, երգում էր, պարում, նկարում. արվեստի մարդ էր` կյանքով լեցուն, նորը տեսնելու ու գնահատելու տաղանդով։

2016 թվականի ապրիլին՝ հակառակորդի կողմից սանձազերծված լայնամասշտաբ պարտերազմի ընթացքում, Արթուրը զոհվել է Մեխակավանի մարտական դիրքերի ուղղությամբ հակառակորդի գրոհները կասեցնելիս։

Արթուրը վերջին անգամ հարազատների հետ խոսել է ապրիլի 1-ին՝ մարտական հերթափոխի բարձրանալուց առաջ։ Մի քանի օր լուր չունենալուց հետո՝ Արթուրի անունը տեղ է գտել անհայտ կորածների ցանկում, ապրիլի 11-ին՝ Կարմիր խաչի միջնորդությամբ հայկական կողմին փոխանցված դիերի մեջ եղել է նաև Արթուրի մարմինը։ Նա հուղարկավորված է Աբովյան քաղաքի գերեզմանատանը։

Արթուր Գառնիկի Գևորգյանը հետմահու պարգևատրվել է Հայաստանի Հանրապետության նախագահի կողմից «Արիության» և  Արցախի Հանրապետության նախագահի կողմից «Մարտական ծառայություն» մեդալներով։

«Հանուն հայ զինվորի» ՀԿ-ն և Banak.info-ի խմբագրությունը ցավակցում են ընտանիքի անդամներին և կիսում կորստյան ծանր վիշտը։

Ալվինա Հարությունյան