Անմահ հերոս Մանվել Գևորգյան

Մանվել Արմենի Գևորգյանը ծնվել է 1997 թվականի մայիսի 14-ին՝ մայրաքաղաք Երևանում։

Մանվելը փոքրուց շատ ճարպիկ երեխա է եղել, աշխույժ, ամեն ինչով հատուկ էր, քանզի տասը ամսականում սկսել է քայլել ու խոսել, հատուկ երեխա էր, շատ էր շտապում ուզում էր ամեն ինչ հասցնել։ Դպրոց մեկ տարի շուտ է հաճախել: Մինչ այդ՝ արդեն գիտեր ռուսերեն խոսել։

2014 թվականին Մանվելն ավարտել է Երևանի թիվ 198 ավագ դպրոցը, որից հետո ընդունվել էր Երևանի ֆիզիկական կուլտուրայի և սպորտի հայկական պետական ինստիտուտի «Ադապտիվ ֆիզկուլտուրայի»  բաժին: 

Մանվելը փոքր տարիքից կարատեով է զբաղվել ու Եվրոպայի առաջնությունում առաջին հորիզոնականն է գրավել: Նա սպորտը չի շարունակել՝ վնասվածք ստանալու հետևանքով, բայց տեսնելով Մանվելի մրցանակներն ու պարգևները, վստահաբար՝ առաջիկայում դեռ լսելու էինք մարզիկ Մանվելի հաջողությունների մասին։

2015 թվականին՝ ուսումը կիսատ թողնելով, անցել է պարտադիր զինվորական ժամկետային ծառայության Արցախի Հանրապետության (այժմ օկուպացված է Ադրբեջանի կողմից) Մարտունու շրջանի N պաշտպանական զորամասում։ Ծառայության ժամանակ արժանացել է կրտսեր սերժանտի զինվորական կոչման, ծառայել է՝ որպես սանհրահանգիչ։

2016 թվականի ապրիլին թշնամին ձեռնարկել է լայնամասշտաբ ռազմական գործողություններ արցախա-ադրբեջանական սահմանի ողջ երկայնքով՝ օգտագործելով օդուժ, ծանր զինտեխնիկա և մեծաքանակ կենդանի ուժ։ Մարտական գործողությունները տևել են մի քանի օր, որից հետո հակառակորդը պարբերաբար խախտել է հրադադարի պայմանավորվածությունը։

Ապրիլի 14-ին՝ հակառակորդը խախտելով կրակի դադարեցման շուրջ ձեռք բերված բանավոր պայմանավորվածությունը, խախտել է հրադադարի պահպանման ռեժիմն ու արցախա-ադրբեջանական սահմանի որոշ հատվածներում ձեռնարկել սադրիչ գործողություններ, որի արդյունքում հակառակորդի կրակոցից զոհվել է ՊԲ զինծառայող Մանվել Արմենի Գևորգյանը։

Մանվել Գևորգյանը հետմահու պարգևատրվել է Հայաստանի Հանրապետության «Արիության», Արցախի Հանրապետության  «Մարտական ծառայություն»  մեդալներով։

Հարազատ դպրոցում Մանվելի պատվին դասասենյակ է անվանակոչվել՝ նրա անունը վառ պահելու համար։

«Հանուն հայ զինվորի» ՀԿ-ն և Banak.info-ի խմբագրությունը ցավակցում են ընտանիքի անդամներին և կիսում կորստյան ծանր վիշտը։

Ալվինա Հարությունյան