Անմահ հերոս Արամ Մեժլումյան

1989 թվականին Արարատի մարզի Շահումյան գյուղում է ծնվել Մեժլումյանների ընտանիքի արու զավակը, ով զոհվել է հայրենիքի պաշտպանության գործում։

Դեռ փոքրուց Արամը խաղաղ ու ներդաշնակ բնավորություն ուներ, կարծես իր ներկայությամբ խաղաղություն էր բերում։ Բնության մարդ էր, անտառներ, կենդանիներ ու թռչուններ էր սիրում, այս ամենից նրան կտրելը գրեթե անհնար էր, պատմում է Արամի քույրը՝  Նարինեն։

Սովորել և ավարտել է տեղի Ա.Համբարձումյանի անվան միջնակարգ դպրոցը։ 2006 թվականին մեկնել է ՌԴ, սակայն վերադարձել է իր պարտքը տալու հայրենիքին։

2007 թվականին անցել է պարտադիր զինվորական ծառայության Արցախի` Մարտակերտի շրջանի N զորամասում (այժմ օկուպացված է Ադրբեջանի կողմից)։ Ծառայության առաջին օրվանից Արամն աչքի է ընկել իր նախաձեռնող բնավորությամբ, կարճ ժամանակահատվածում արժանացել է եֆրեյտորի,ապա կրտսեր սեժանտի զինվորական կոչման։

«Տղաս ծառայության առաջին օրվանից գոհ է եղել, երբևէ չի բողոքել: Միշտ հպարտ է եղել, որ ծառայում է: Ասում էի, Արամ ջան դժվար չի՞, ասում էր՝ չէ, մամ ջան, մի մտածիր, եթե դժվար էլ լինի՝ ոչինչ, դժվարությունը տղու համար ա: Շատերն էին ասում՝ ինչո՞ւ հետ եկար, որ գնացել էիր՝ պիտի մնայիր, ասում էր՝ ո՞ւմ է պետք, որ պիտի փախած ման գամ, 2 տարի ա էլի»,-պատմում է մայրը՝ տիկին Լաուրան։

Արամի ծառայակիցը՝ Վահեն, մեզ հետ զրույցում նշում է, որ ծանոթացել են ծառայության ընթացքում, պատճառն այն է եղել, որ երկուսն էլ նույն տարածաշրջանից էին: Հենց դա էլ հիմք է դարձել նրանց հետագա մտերմության համար։ Վահեն պատմում է, որ Արամը շատ խաղաղասեր բնավորություն ուներ, ծառայակիցների միջև ծագած վիճաբանությունները միշտ նա էր կարգավորում։

Կոկիկ զինվոր էր, ցանկացած առաջադրանքի մեջ նվիրվածություն էր դնում, ոչինչ չէր անում ուղղակի անելու համար, հայրենիքը նրա մեջ էր, նա` հայրենիքինը։ Այս գիտակցումն էր նրան առաջնորդում։

2009 թվականին օգոստոսի 4-ին արցախա-ադրբեջանական հակամարտ զորքերի շփման գծի հյուսիսային ուղղությամբ տեղակայված մարտական հենակետերից մեկի պահպանության տեղամասում, թշնամու դիպուկահարի կրակոցից է զոհվել  ՊԲ զինծառայող Արամ Միշայի Մեժլումյանը։

Արամը դեպքից օրեր առաջ փրկվել էր թշնամու գնդակից, հերթապահության ժամանակ թշնամական փամփուշտը մխրճվել էր պատի մեջ՝ չհասնելով իր վերջնական նպատակին, երկրորդը, ցավոք, չէր վրիպել։

Արամ Միշայի Մեժլումյանը հետմահու պարգևատրվել է Արցախի Հանրապետության «Արիության համար» մեդալով, ծառայության ընթացքում էլ արժանացել է «Քաջարի մարտիկ» կրծքանշանի։

«Հանուն հայ զինվորի» ՀԿ-ն և Banak.info-ի խմբագրությունը ցավակցում են ընտանիքի անդամներին և կիսում կորստյան ծանր վիշտը։