Հուլիսյան գործողությունների դադարից հետո տվյալ ուղղությամբ հրադադարի խախտումները համարյա թե կրկնակի ավելացել են. Տոնոյան

Ազգային ժողովում մեկնարկել է Կառավարության հետ հարցուպատասխանը:

«Իմ քայլը» խմբակցության պատգամավոր Տաթեւիկ Հարությունյանն իր հարցն ուղղեց պաշտպանության նախարար Դավիթ Տոնոյանին: Պատգամավորը մեջբերեց այսօր տարածված տեղեկությունը, թե զինծառայող է զոհվել ադրբեջանական հերթական սադրանքի պատճառով: Նա խնդրեց ներկայացնել, թե ինչ իրավիճակ է այս պահին, եւ կա՞ արդյոք լարվածություն:

Տոնոյանը նախ եւ առաջ խնդրեց պատգամավորներին եւ Կառավարության անդամներին մեկ րոպե լռությամբ հարգել զինծառայողի հիշատակը: «Հաշվի առնելով իրավիճակը՝ հուլիսյան դեպքերից հետո մեր համար շատ ցավալի կորուստ է սա»,- ասաց Տոնոյանը:

Այնուհետեւ նիստերի դահլիճում գտնվող բոլոր անձինք ոտքի կանգնեցին եւ լռությամբ հարգեցին զինծառայողի հիշատակը:

Անդրադառնալով բարձրացված հարցին՝ նախարարը հայտնեց, որ ադրբեջանական զինված ուժերի ստորաբաժանումներն իրականացնում են ամրաշինական աշխատանքներ՝ որոշակի չեզոքացնելու մեր դիրքապահների եւ մեր դիրքերի գերակայությունն ու առավելությունը: Հենց այդ պատճառով օգտագործվում է տարբեր տրամաչափի զենք, եւ լինում են նման պատկերներ: Տոնոյանի փոխանցմամբ՝ այս իրավիճակն արդեն ձգվում է 2 շաբաթ. «Մենք տեղեկատվական զսպվածություն ենք ցուցաբերել: Երեկ ադրբեջանցիները, ունենալով վիրավոր, ահազանգեցին այս խնդրի մասին: Այս դեպքերի վերաբերյալ ամբողջ տեղեկատվությունը տրամադրվում է համանախագահողներին, ԵԱՀԿ գլխավոր քարտուղարը տեղյակ է այս ամենից, մենք մի քանի անգամ զգուշացրել ենք, որ առկա չէ այս իրավիճակի զարգացման ռիսկերի նվազեցման որեւէ մեխանիզմ»,- ասաց Տոնոյանը:

Նա հավելեց, որ Ադրբեջանի պաշտպանության նախարարությունը հայտնել է իր մտահոգությունը, զգոնությունը բարձրացրել է, իսկ այդ մտահոգությունը կանխատեսելի է, որովհետեւ համապատասխան գործողություններ են իրականացվել:

Հայրապետյանի հարցին, թե կա՞ արդյոք լարվածության աճ հուլիսյան դեպքերից հետո, Տոնոյանը պատասխանեց. «Հուլիսյան գործողությունների դադարից հետո տվյալ ուղղությամբ հրադադարի խախտումները համարյա թե կրկնակի ավելացել են: Հույս ունենք, որ համապատասխան գործողությունների արդյունքում դադարը պահպանվելու է եւ նպաստելու է բանակցային գործընթացին: Այնուամենայնիվ, համոզված եղեք, որ գործողությունները համարժեք են»,- եզրափակեց պաշտպանության նախարարը:

 

Armtimes.com

Ծանուցում․ Կայքից մեջբերումներ անելիս հղումը www.banak.info-ին պարտադիր է: Կայքի հոդվածների մասնակի կամ ամբողջական հեռուստառադիոընթերցում առանց www.banak.info-ին հղման արգելվում է:

Մեկնաբանություններ